onsdag 15. august 2018

Utrulege Skåpet - DNT-hytte


Sonen vår, Bendik Matias (7 år), har eitt sentralt kjennemerke på tur:
Det er at han har med seg ein skistav, og på turen til Skåpet kunne han fortelje:

"Livet er ikkje verdt å leve utan ein stav!"

Han var ikkje gamle karen før han tok staven i bruk på tur, og vi innsåg fort at det var ein viktig motivasjonsfaktor. Starten på "stav-eventyret" har eg skrive om i dette blogginnlegget. Kven hadde trudd at uttrykket "Gi mannen en stav?" skulle få sin renesansse over 25 år etter at Oddvar Brå brakk staven i Holmenkollen?

Staven er ein trufast følgjesven på turar - her frå tur til Søtekollen hausten-17

Skistaven var såleis også med når vi skulle på tur til DNT-hytta Skåpet ved Lysefjorden i slutten av juni-18. Denne hytta eller rettare sagt hyttene har vi sett mange flotte bilete av, og turen har stått på "bucketlista" ei god stund.


Og sjølv om du er midt i kjernen av Lysefjorden, og Skåpet er eit populært overnattingsturmål - så opplevdest det nærast som ei ødemark samanlikna med folkemylderet på Preikestolen

Turen er skildra på ut.no: Vinddalen - Skåpet og er ca. 3,7 km ein veg med ca. 200 høgdemeter stigning. Stigninga er jamn heile vegen, så du merkar knapt at du går oppover!

Dette er ein tur som eignar seg veldig godt for barnefamiliar. Stien består av mykje stein, så det kan vere litt krevjande for dei minste å gå utan ei hand å halde i. Men for ungar som meistrar å balansere og hoppe frå stein til stein, så er dette ypparleg.



Og har du assosisjonar til overfylte fellesrom, sovemadrasser på rad og rekke, lukta av våte klede og mangel på privatliv når du høyrer ordet DNT-hytte - ja, så kan du gløyme alt dette når du drar til Skåpet:

Her kan du leige ditt eige "private" krypinn med panoramavindu og tilgang til badstu og spesialbygd dusj. Med andre ord ein stad der du kan la romantikken blomstre og familieidyllen leve!

Små, ekslusive krypinn med panoramavindauge på baksida
Men hyttene er populære, så du bør vere tidleg ute for å sikre deg overnatting. Folk vi snakka med på turen hadde booka hytte allereie i oktober, og nokre andre vi høyrde om hadde bestilt i januar! Eit lite søk på DNT sin hyttebooking avslørte likevel at det er fullt mogeleg å få leigd seg eit hytte ei veke eller to fram i tid. Og er småhyttene oppbestilt, så kan du liggje i hovudhytta utan å ha bestilt på førehand.

Skåpet ligg for øvrig i rutenettet til Lysefjorden rundt og det er mellom anna berre to timar å gå til Flørli - der du kan kose deg med 4444 trappetrinn!

Her er fleire bilete frå Skåpet - får du ikkje lyst til å ta turen?

På veg innover Vinddalen passer er du ei gamal DNT-hytte. Den står opa, men er ikkje lenger i DNT sitt rutenett.


Ankomst Skåpet og hyttevakta har hengt opp flagget. 


Eit bilete frå innsida av hytta  - moderne og lekkert!



Vi måtte sjølvsagt ta eit bad i vatnet nedanfor hyttane - anbefalast!

fredag 6. juli 2018

Folkemylderet Preikestolen (604 moh)

"Veit du, Anita, at folk som går på Preikestolen er ganske uhøflege? Det er ingen som seier hei når vi passerer dei!"

fortalte Sanna Oliva (9 år) til venninna mi som vi var på besøk hos i Stavanger.


Sanna Oliva har skjønt noko viktig - nemleg at når vi går tur på fjellet eller andre stader, så er det høfleg å helse på kvarandre. På Preikestolen derimot - er det eit folkemylder utan like - så det ville rett og slett blitt veldig travelt om alle skulle helse på kvarandre. 

Eg og ungane skulle på Stavangertur - og eitt av turmåla måtte sjølvsagt vere Preikestolen. Det var 10 år sidan eg var der sjølv, og no ville eg ta ungane med til denne turistmagneten. Eg hadde førebudd dei på at det kom til å vere veldig mykje folk, og at vi ville sjå folk som gjekk i småsko med handveska over skuldra. For slik opplevde eg det for 10 år sidan - ville noko vere endra sidan sist? 

VG har ein artikkel om fem fantastiske fjellturer som alle kan klare, og Preikestolen er ein av dei. Dei skriv:

"Preikestolen ved Lysefjorden er kanskje et av Norges mest ettertraktede fotoobjekter og det er ikke få som har en selfie herfra på sosiale medier. Over 250.000 tar turen hvert år og er godt kjent internasjonalt. I november ble det også spilt inn scener til «Mission: Impossible 6» her og CNN har omtalt Preikestolen som en av de største naturopplevelsene du kan oppleve. På toppen – 604 meter over Lysefjorden, har du fantastisk utsikt over fjorden og turen er beregnet til å ta rundt fire timer tur-retur.


Fullt av bilar på parkeringsplassen ved Preikestolhytta, så vi måtte parkere lenger nede. 

Vi er klar for tur!
Vi starta med friskt mot på turen. Vi måtte parkere på den nedste parkeringsplassen, og sjølv om det framleis var god plass der, skjønte vi at her kom det til å bli mykje folk. Det var jamt sig med personar heile vegen - men heldigvis lite kødanning. Det var køtendensar ved Tjødnane - der ligg det eit vatn som mange nytta høvet til å bade i eller ta ein pause ved - men elles så kunne vi gå ganske greitt i eige tempo utan altfor store hindringar. 

Noko av det første vi såg, var derimot ei dame med handveska over skuldra - og eg tenkte: "Ja, ja - her er det lite som har endra seg!". Men heldigvis - denne personen var unntaket i forhold til den folkemassen vi møtte.
Sherpaer har tilrettelagt stien veldig godt!


Skotøyet var også rimeleg bra på dei fleste - folk har skjønt at det kan vere greitt å gå med fjellsko eller joggesko. Såg nokre innslag av converse og andre tøysko, og ved passering av ein godt vaksen mann utbraut Sanna Oliva: 

"Han der mannen gjekk med slike sko som farfar ville ha brukt til dress!"

Eg snudde meg og konstanterte at mannen gjekk i svarte pensko! 

Sidan vi tok turen på ein strålande solskinnsdag, var dei fleste vi møtte også godt nok kledde. Eigenleg litt for godt kledde..... for medan vi lengta etter ein endå kortare shorts og ein endå tynnare singlet, så var det veldig mange som kom både i langbukser og langerma genserar - gjerne med ei jakke utanpå!

Fleire stader undervegs var det informasjonsskilt om turen, og som synte kor langt du var komt

Når det gjeld turskildring til Preikestolen, så er den omtala fleire stader på nettet. Her finn du eit par nyttige linkar: 
Preikestolen på ut.no

Turlengd: Knappe 4 km ein veg og ca. 330 høgdemeter stigning. 


Det er mogeleg å få kjenne på magasuget på Preikestolen
- men opplevast likevel trygt og greit. 
Er det ikkje veldig skummelt å gå på Preikestolen? 
Dette spørsmålet fekk eg av fleire, og ikkje minst - er det ikkje skummelt å vere åleine med ungane der? For min del så vil eg svare heilt klart "Nei!". 

Det meste av turen går i terreng utan nokre luftige punkt - det er først når du nærmar deg sjølve Preikestolen at du merkar dei stupbratte fjellsidene rett ned i fjorden. Her er det derimot gjort mange sikringstiltak med rekkverk og bruer, og sjølve platået er ganske stort. Du vel sjølv kor langt ut på kanten du vil gå.  Mange vel å halde seg innafor den store sprekka i platået. Vi satte oss ganske midt på platået for å ete lunsj og følte oss ganske trygge.

Vi sat relativt trygt midt på platået. Det var kø for å ta bilete ute på kanten. 
Det var fleire som torte seg heilt ut på kanten for å nyte utsikta

Eg kan sjølvsagt ikkje vurdere korleis det opplevast for andre - men det ser ofte verre ut på bilete enn det eigentleg er. Dersom du taklar høgda greitt, vil eg også anbefale å ta turen opp på høgdene over Preikestolen for å få sett den ovanfrå. Det var eigentleg meir spektakulert enn å sitje nede på sjølve stolen - og litt mindre folksamt!
Preikestolen sett ovanfrå

Fin utsikt  innvoer Lysefjorden frå høgda ovanfor Preikestolen. Her var det også mykje mindre folk. 
Rett forbi badeplassen på Tjødnane ligg det ei nødbu. Her kan du ringe nødnummer og få koden til låsen dersom du kjem i dårleg vër og har behov for ly: 


Bruer og kjettingar var sett opp på dei mest utsette og luftige plassane. Mange forelska par har nytta sjansen til å henge opp ein kjærlighetslås på kjettingane. Kva hesteskoen symboliserer er eg meir usikker på. Kanskje lukke?

På returen gjekk vi nedom Preikestolhytta - ikkje minst for å inspisere den nye hytta som ikkje var komen då vi var der i 2008.

Den nye Preikestolhytta har moderne arktitektur og var stor og flott. Den vert også nytta mykje til konferansar. 

Utsikt over gamlehytta og vatnet nedanfor

I varmen smakte det ekstra god med is etter endt tur! 

Velkomen tilbake - vi kjem nok att ein gong!

tirsdag 3. juli 2018

Dagturhytta på Fløgen og Hatlesetnipa (583 moh)


Hatlesetnipa (583 moh) har i mange år vore ein av våre kvardagsfavorittar når det gjeld fjellturar. 
Vi har brukt å gå turen frå Hatleset og opp, medan folk frå Florø går oftast frå Grov.
Det ideelle er jo å ta det som ein rundtur, men då bør du ha to bilar tilgjengeleg. 

No har Flora kommune fått opp dagsturhytte på Fløgen.
Hytta ligg på stien frå Grov og opp på Hatlesetnipa. 

Vi har sett mange flotte instagrambilete frå denne dagsturhytta, 
og vi var ikkje i tvil om at ein søndagstur til denne hytta og vidare opp til Hatlesetnipa ville vere god bruk av ein fridag med rimeleg godt vêr!

Slik finn du fram: 
Turen startar frå parkeringsplassen ved Grov Fv 614 mot Svelgen. Ved første avkjørsel på høgre side etter trafostasjonen, er det god plass til parkering ved starten av skogsvegen. 

Turen oppover er ikkje merka, men du følgjer skogsvegen. Det er ein plass der skogsvegen deler seg i to - der skal du gå til venstre. 

Her tar vi av frå skogsvegen og over på sti.
Det er ikkje merka, men stien er tydeleg
Når du nesten er til vegs ende på skogsvegen, går det ein tydeleg sti til venstre. Her kunne det godt vore eit lite merke, men det er det ikkje, så du må berre følgje godt med på vegen oppover. Stien er så pass tydeleg at når du ser den, så er du ikkje i tvil om at det er den rette stien. Vidare derifrå er det god sti opp til hytta og vidare til Hatlesetnipa. 

Vi sakna litt enkel merking på nokre viktige punkt, men det kjem forhåpentlegvis på plass etterkvart. Men dersom du er obs på det vi har presisert over, så skal det gå greitt å finne fram. Dersom du nyttar appen til ut.no, kan du også laste inn turskildringa og følgje med på kartet om du er på rett veg.  

Lengd: 
Ca. 2 km til dagsturhytta som ligg på 468 moh
Ca. 3 km frå Grov til Hatlesetnipa (583 moh)

Både frå dagsturhytta og frå toppen av Hatlesetnipa har du fantastisk utsikt til Nordalsfjorden, austover mot Eikefjord, vestover mot Florø og øyane og øyane i vest og sør. 

Mange kjekke trær å klatre i på veg gjennom skogen!

Titt tei!
To som næmar seg første mål på turen - dagsturhytta!

Flott utsikt frå hytta mot øyane utanfor Florø!

Inne i hytta kan du sitje på hemsen og
nyte utsikta om det er dårleg vêr.

Frå dagsturhytta såg vi vidare til dagens neste mål - Hatlesetnipa - som er lett gjenkjenneleg med masta på toppen. 

På veg opp kan du nyte utsikta mot Nordalsfjorden og fjella i Ålfotenmassivet

Vi tar ein dab for dagens turmål - Hatlesetnipa 583 moh

Litt kos er lov på tur!

På veg ned att er det berre å nyte utsikta så og seie heile vegen!
Takk for turen!


onsdag 27. juni 2018

Det finst alltid eit fjell...... Klauva (847 moh) i Jølster


På heimferd frå Klauva
"Det finst alltid eit fjell for den som er gira!"
- sitat Bendik Matias 7 år

Og i går var det fjellet Klauva (847 moh) i Jølster som sto for tur. 
Ny topp for alle i familien -
og ein av turane i årets titur til Indre Sunnfjord turlag. 

Turen er godt skildra på ut.no
lett å finne fram og fint terreng å gå i. 
Og utsikta: 
Vakre Jølster ser ein seg aldri mett på! 

Dagens erfaring (nok ein gong): 
Sti er kjekkare å gå på enn skogsveg!
Då vi passerte Strandstøylen, gjekk tempoet monaleg opp!

Strandastøylen - det går traktorveg heilt opp til hit. Dei sprekaste klarar også å sykle opp!


Ny topp og "ny" utsikt!

torsdag 14. juni 2018

Solund si dronning - Pollatinden (541 moh)


Pollatinden er det nest høgaste fjellet i Solund, og vert omtala som dronninga i øyriket. Om det er statusen som nest høgaste fjell som er opphavet til dronningnamnet eller om det er det faktum at Dronning Sonja faktisk har gått turen - det veit eg ikkje. Men når det gjeld utsikt - står ikkje Pollatinden tilbake for fjellet som er høgast - Krakhellenipa (som då vel må vere Kongen?).  Enkelte stader finn du også Pollatinden omtalt som "Norges fineste sted"!

Uansett - kven har ikkje lyst til å gå i Dronninga sine fotspor?

Vi var på Pollatinden for første gong for 10-12 år sidan. Når vi så skulle tilbake til Solund på helgetur med bubil, så var dette ein av dei turane vi hadde lyst til å gå saman med ungane.

Vi har nett starta på turen og ser framleis ned til hovudvegen ved Pollen. Fine berg å gå på!
Slik finn du fram: 
Turen startar rett ved hovudvegen ved Pollen, ca. 4 km nordaust for Hardbakke og 1 km nordaust for Solund Verft. Det står skilt ved startpunktet, og det er fleire utkøyrsler i nærleiken der du kan parkere utan at du er til hinder for trafikken elles. 

Turen har jamn stigning oppover, og det meste av turen går på berg. Det er derfor eit veldig kjekt terreng å gå i for barn - i alle fall når det er tørt! For både vaksne og ungar er det også spanande å studere geologien med raudleg sandstein blanda med konglomerat - noko som gjerne medfører ein del stopp undervegs. Mange fine steinformasjonar i berga! 

Stien er godt varda, så det er enkelt å finne fram. 

Lengd: ca. 2,5 km ein veg
Tidsbruk: 2,5 timar t/r
Nokre stopp undervegs for å nyte utsikta!

Utsikta frå toppen av Pollatinden er storslagen - ut i havet til Utvær fyr, nordvestover mot Bulandet, Værlandet og Alden og til øyane utanfor Florø, og sørover mot Gulen og fjella innover i Stølsheimen. Vi kunne også sjå austover mot kjende fjell som Storehesten.



 På toppen: 

Alden strålar opp midt i biletet


Kartutsnitt frå ut.no:
Pollatinden ligg der det er merka med raud ring på kartet. 

Stien frå hovudvegen og opp på toppen.

Turskildring på ut.no