torsdag 11. august 2016

Hålandsnipa (981 moh) - med utsyn over Høyanger!

Utsikt over Høyanger sentrum frå Hålandsnipa

Som ivrig brukar og følgjar på Instagram, 
får eg ofte tips til nye fjellturar. 
Eitt av turmåla eg "oppdaga" i fjor var Hålandsnipa (981 moh) i Høyanger. 

Bileta viste ein flott utsiktstopp med utsyn over Høyanger sentrum. 

Turmålet blei ikkje realisert i fjor, 
men i år har vi fått tatt nokre få av mange turdraumar i dette området. 

Slik finn du fram: 
Når du kjem til Høyanger, tar du fjellvegen oppover mot Siplo. 
Når du nærmar deg toppen, går det ein veg til høgre skilta med "Strupen".
Du køyrer denne til du kjem til ein låst bom. 
Her er det god plass å parkere og det er informasjonsskilt om turen.



Du startar på 580 moh og skal ende på 981 moh.
Eller rettare sagt: for å få den beste utsikta må du gå om lag 100 høgdemeter ned att på platået...

Turen er ca. 4,5 km ein veg. 
Du følgjer først anleggsvegen mot Nedre Breidalsvatnet. 
Eit lite stykke før demininga, tar du til høgre og følgjer halsen oppover.
Eitt godt tips: merk deg turnummera du skal følgje på informasjonstavla!
Skiltinga undervegs viser til desse turnummera. 
Vi følgde rute H12. 
Tidsbruk: ca 1,5 - 2 timar i roleg tempo. 

Kartutsnitt som viser Hålandsnipa i høve Høyanger sentrum. Startpunkt er markert med blått merke. Du følgjer anleggsvegen vidare, og tar til høgre for hyttene oppover mot Halsen og opp til toppunktet på 981 moh. For å få den beste utsikta må du gå nedover ryggen om lag 100 høgdemeter og ca. 1 km. 
Lett og god sti å gå på, 
og du stig ganske raskt til topps. 

Vi har tatt av frå anleggsvegen. Stien går til høgre for hyttene og oppover Halsen. 

Utsikta frå toppunktet på 981 moh. Her ligg det også ei bok å skrive seg inn i. 

Fin fin utsikt over Høyanger sentrum og fjella i kring!
Vi hadde ein heil dag til disposisjon,
så då måtte vi nytte sjansen til å gå endå fleire turar same dag.
Derfor blei det også tur til Langefjellet/Toppen-hytta og Kyrkjebøstølen.
(Innlegg frå turane kjem etterkvart)
Totalt ca. 2 mil gange totalt og mange opplevingar rikare!
Ein fjelldag å vere nøgd med!

Ein hjartestein fann vi også på vegen!



fredag 5. august 2016

Sjå deg ikkje tilbake: 1268 + 2500 trappetrinn i Høyanger!



Å gå i trapper til fjells, kan høyrast enkelt ut
- men eg skal love deg at du merkar det både i lår og leggar, 
og for mange vert også høgdeskrekken kraftig utfordra! 

Norges lengste trappetur er Flørlitrappene i Lysefjorden
med sine 4444 trinn. 

I Høyanger kan dei ikkje skilte meg like mange trinn, 
men dei har derimot to trappeturar. 
Turen på 1268 trinn ligg rett ved Høyanger sentrum, 
og har også sitt eige trappeløp - Gøyanger
Lenger inne i dalen - det som bokstaveleg talt heiter Dalen,
finn du ei lenger rute med 2500 trinn.
Her er det også ei trallebane.
Trappene var sentrale under bygginga av røyrgatene i 1916. 
Både trappene, røyrgata og trallebana er i dag historieberar 
om tida då industrien kom til Høyanger. 
Etter dette har trappene hatt stor betydning for å knytte Høyangerfolket til fjellet.

Gå begge trappene på ein dag
- eller ta dei som to ulike turar! 

Vi har testa begge med ungane: 
Når 1286 trappetrinn gjekk rimeleg smertefritt, 
så var det ingen grunn til ikkje å doble talet neste gong. 
Og med bading i Høyangerbadet som bonus, 
så er det fin turmotivasjon for små born! 

Trapp 1: 1268 trappetrinn - sjå deg ikkje tilbake!

Turen startar ved Riksveg 55 (hovudvegen) ovanfor Hydro.
Distanse: 600 meter
Høgdeskildnad: 45 - 356 moh
Dei raskaste går trappene på under 8 minutt....
Trappene er bratte, særskilt fram til trinn 580 med 40 % stigning 
- om du er redd for høgder, bør du la vere å sjå deg tilbake!
Så flatar det litt ut med 33 % stigning. 

Ved trinn 186 er det gøymt ein geocache. 
Det er berre å klyve til sides og finne cachen,
og unngå å snu seg...;)

Bendik er framleis litt skeptisk til høgdene, og held seg godt fast medan
mora loggar geocachen.
Turen startar ved Riksveg 55 (hovudvegen).
Distanse: 600 meter
Høgdeskildnad: 45 - 356 moh

Om du er redd for å gå trappene ned att, 
kan du ta til høgre inn på ein sti når du står på toppen av trappene. 
Denne fører deg ned på bilvegen som går til Siplo, 
og du kan gå denne attende til bilen. 

Dei aller første nervepirrande trappetrinna.... men snart er høgda gløymt!

"Hei - der oppe! Her kjem vi!"


Utsikt utover Høyangerfjorden

Trapp 2: Sjakk matt etter 2500 trappetrinn 


Køyrer du inn i Dalen i Høyanger, 
kan du gå dei lengste trappene på totalt 2500 trinn. 
Her er ikkje stigninga fullt så bratt som i sentrum,
men like fullt kan ein merke høgda her også.



Parallelt med trappene, går det ein sti,
så ein kan velje om ein vil ta denne i staden
- opp eller ned, eller begge vegar.

Når du har passert 2400 trappetrinn,
kjem du til ein avsats der det er malt eit sjakkbrett
og spelefigurar malt på runde steinar.
Fascinerande gjort -
og ekstra kjekt for ungane!


Går du heilt til enden av trallebana,
har du passert 2500 trappetrinn
- og kan gratulere deg sjølv med flott innsats!

Det er visstnok veldig fint å gå vidare innover fjellet.
Det har vi til gode endå, men det blir nok ein gong!

Det ser veldig skummelt ut å skulle køyre trallebana nedover....
Vi var så heldig at vi fekk sjå den i aksjon,
og den gjekk nokså roleg og kontrollert nedover!
Men det føltes likevel tryggast å gå ;)


Kart som viser kor trappene er i Høyanger:

søndag 17. juli 2016

Fossestien på Gaularfjellet: Langestølen - Likholefossen


Langestølen er eitt av 4 alternative startpunkt for Fossestien
Fossestien går frå Gaularfjellet i Balestrand kommune til Viksdalen i Gaular kommune. Sti går langs elva Gaula og er totalt 21 km lang. På strekninga passerer du 14 fossar og 7 vatn. Stien er merka med raud F.

Du treng ikkje å gå heile stien på ein gong, men kan gå den i fleire etappar. Det er 4 stadar det er naturleg å starte og der det er tilrettelagt med parkering: Torsnestølen, Langestølen, Likholefossen og Eldal. Dersom du ynskjer transport til startpunktet, går det fast skyss frå Hov Hyttegrend kl 10 kvar dag i sesongen.

Kart over heile Fossestien - henta frå www.fossestien.no


Vi har gått fleire etappar av Fossestien tidlegare, men det byrjar å bli nokre år sidan, så denne sommaren har vi tenkt at vi skal gå delar av den med ungane. Vi starta med etappen Langestølen - Likholefossen som er 7 km lang, og det er denne etappen vi viser bilete frå her. Kanskje blir du inspirert til å ta turen på Fossestien du også - anten delvis eller heile på ein gong!

Utsikt mot Langestølen frå parkeringa - her er det stølsdrift på sommaren.


God skilting undervegs med kart og informasjon om avstandar


Mektige fossefall undervegs:




Imponerande tilrettelegging av stien!

Bratteteigstølen: 
Etter ca. 2 km kom vi til Bratteteigstølen




Myravatnet: 
Etter ca. 4 km kom vi ned til Myravatnet - fint å ta ein liten pause her før ein går vidare. 

Vegen vidare:



Hovstølen:

Vi går på oppsida av hyttefeltet ved Hoffslåttene:



Ved endepunktet Likholefossen: Brua ved Likholefossen er ein turisattraksjon i seg sjølv, og mange turistar stoppar her.

2 små har gått turen som ein leik - fin tur for små born!

Ved Likholefossen kan ein også leite etter geocache. 

Og som belønning for flott innsats, kan ein kjøpe is på Hov Hyttegrend eller ta ein tur innom kiosken på Flatheim 4H- og friluftsgard!





Tusen takk til Ottar Hov - eigar av Hov hyttegrend - som har brukt meir enn 10 år av sitt liv på å leggje til rette Fossestien for oss glade vandrarar! 
Ein innsats det står respekt av!

Og ynskjer du å overnatte på ei hytte eller campingplass i flotte naturomgjevnader, så er Hov hyttegrend å anbefale!
Med denne som base, har du eit godt utgangspunkt for mange flotte utflukter! 

mandag 11. juli 2016

Geocache: Viewpoint Utsikten Gaularfjellet

Vi finn stadig på nye sprell: i går gøymde vi ein ny geocache på Viewpoint Utsikten Gaularfjellet. Den er no publisert- løp og finn!

tirsdag 28. juni 2016

I verdas største leikeland kan du gjere mange ting....

I verdas største leikeland kan du balansere på ein stokk!

Har du som så mange andre familiar planar om besøk i fornøyelsespark i sommar? 
Kanskje skal de reise langt av garde - 
til Kristiansand, Legoland eller Liseberg?
Er du bekymra for ein dyr og hektisk ferie? 

Gløym då ikkje at: 

Verdas største leikeland er naturen! 

- lett tilgjengeleg, gratis og opent 24 timar i døgnet! 

Kan du ynskje meir?

Bergen og Hordaland Turlag hadde i helga offisiell opning av verdas største leikeland

I verdas største leikeland kan du: 
- klatre på berg og i trær
- lage kongledyr
- balansere på stokkar
- liggje på magen og drikke av ein bekk
- finne steinar forma som hjarte, firkantar m.m. 
- hoppe frå stein til stein på stien

www.mittlekeland.no finn du endå fleire tips til kva du kan gjere og kor du kan dra! 

Her er nokre glimt frå vårt leikeland - kanskje du får nokre tips og idear her også?

I verdas største leikeland kan du både leite etter geocache eller leggje ut ein ny!

I verdas største leikeland kan du padle i kano - Barnas turlag har mange kanoar liggjande til fritt bruk for medlemar. 
I verdas største leikeland kan du leite etter steinar med ulike former - t.d. hjarter!
I verdas største leikeland kan du gå på mikroeventyr -
utforske naturen rett utanfor døra di - kanskje finn du nok nytt?
I verdas største leikeland finn du mange spanande stiar!
I verdas største leikeland kan du leike med ord du finn på skilt!

I verdas største leikeland kan du gå på ski eller byggje iglo når det er vinter!

I verdas største leikeland kan du leite etter skulpturar i naturen -
her med bamsefar i lia!
I verdas største leikeland kan du gå på uttallige T-merka stiar!
I verdas største leikeland kan du besøke ei DNT-hytte
- ikkje heilt gratis, men nokså rimeleg....

I verdas største leikeland kan du ta ei natt i naturen!
#nattinaturen
I verdas største leikaland kan du besøke ei fyrlykt - her frå Skongsnes fyr som også er DNT-hytte. 
I verdas største leikaland kan du møte mange rare dyr!
I verdas største leikeland kan du nytte naturen som fjernsynsskjerm:
"Vi har ikkje sett på TV heile dagen.
For vi har jo vore på tur.

MEN:
Det er jo nesten som å sjå på TV det også
- for vi ser jo på naturen når vi går!"
(Sitat Sanna Oliva  6 år)


I verdas største leikeland kan du brenne bål og kose deg med mat i det fri!

Verdas største leikeland kan by på det meste
- nyttar du deg av det?
#mittlekeland