fredag 21. juni 2019

Moakamben - dagsturhytta i Årdal

Dagsturhytta Moakamben i Årdal
På turen til Moakamben, fekk vi for første gong kjenne skikkeleg på årets mygg! 
Den var rett og slett skikkeleg plagsom - stakk godt gjennom ullgensarane. 
Men det er ein del av sommaren det også - dessverre. 

Dagsturhytta i Årdal er lett på sjå på toppen av Moakamben når du kjem køyrande inn mot Øvre Årdal, og byr dermed på god utsikt over bygda.


Det er - som mange av dagsturhyttene - ein lett tilgjengeleg tur:

Hytta ligg på 249 moh og det er 0,7 km å gå opp til hytta.
Litt stigning, men det må ein forvente for å få utsikt.

Dagsturhytta ligg nær sentrum i Øvre Årdal, med start frå parkering på Moa. 

Parkering:

Stor parkeringsplass på Ytre Moa.
Herifrå er det mange turalternativ.

Stien er merka.
Dei  reknar 40 minutt opp grunna stigninga, men dei fleste vil nok gå turen på 20-30 minutt.

Mange turmogelegheiter frå parkeringa på Ytre Moa, så det går fint å forlenge turen til dagsturhytta. 


Det var hengt opp fleire slakke liner rundt hytta som ein kunne teste balansen på! Kjekt for både små og store!

Dagsturhyttejakt: 

For øvrig så er det no mogeleg å gå på dagsturhyttejakt.
Det er lagt ut brosjyrer i hyttene og kvar hytte har fått sitt unike stempel.
Når ein har samla 5 hytter, kan ein få premie i banken.
Dersom ein har vore på alle 26 (når dei er komne opp), kan ein få endå større premie.

For vår del var dagsturhytta i Årdal nr. 11 i rekkja av dei vi har besøkt.
Det som er litt kjedeleg, er at besøka våre ikkje tel i dagsturhyttejakta.....
Vi må derfor gå alle hyttene på nytt for å få stempel i brosjyra.
Det var litt demotiverande for vår del....
Vi kjem nok ikkje attende til alle 11 vi har besøkt til no,
men 5 nye hyttebesøk skal vi no i alle fall klare.

Og for dei som nett har starta hyttejakta, så er det heilt sikkert med på å motivere dei små til fleire turar!








torsdag 20. juni 2019

Èin dag - 7 fjell i Førde


Lang rekke med folk - totalt 62 som starta på 7-fjellsturen 2019. Her frå oppstigninga til Halbrendsnipa. 

Eit kvart turlag med respekt for seg sjølv har  minst ein 7-fjellstur! 
Så også med Indre Sunnfjord turlag. 

Dei har faktisk etterkvart fleire, men den eldste og mest kjente går i Førdefjella.
Dei kunne faktisk feire 25 år jubileum for 7-fjellsturen i år! 

Og i år deltok eg for første gong. 

Tenk deg å kunne få lov til å gå ein heil dag
- utan andre bekymringar enn at du må få i deg nok drikke og næring. 

Rett nok - litt bekymringar kring vonde knær og tær var det også! 
Men bortsett frå det - så har du ein heil dag der du kan gløyme alt anna. 

Du skal berre gå, gå, gå
og du har ein person føre deg som styrer tempoet, så det treng du heller ikkje tenkje på. 
Og tempoet er nærast i kvilepuls også i oppoverbakkane. 

Høyrest ikkje det litt deilig ut? Eller.....

Litt strabasiøst i 37 km, 2700 høgdemeter opp og 3000 høgdemeter ned, sa du?

Eg må innrømme at bekymringane mine var størst på førehand: 
Ville eg greie dette?
Korleis ville det gå med mine sarte tær som stort sett endar med blå nagl kvar fjellsesong? 
Korleis ville det vere å gå i varmen - vèrmeldingane varsla om makstemperatur på 27 C?

I ettertid sit eg igjen med kjensla av at dette gjekk overraskande greitt 
Eg skal ikkje skryte på meg at det var "lett som ein plett" 
- trass alt skal det merkast når ein går nærare 4 mil i fjellet, 
men eg hadde frykta det verre. 

Det var varmt, ja - men ikkje så gale som venta. 
Vi hadde selskap av veldig mange fluger, 
og tærne og knea vart litt ømme.
Men stort meir var det ikkje å klage på: 
i grunnen så hadde eg (vi) det veldig fint!

Start kl 07.30 i Vasslia. Turleiar gjev klåre instruksar for turen. 
For dei som ikkje kjenner 7-fjellsturen i Førde, så går den som følgjer: 

Vi starta i Vasslia kl 07.30 der vi først gjekk opp til Fureviknipa
Derifrå gjekk vi vidare til Skinnbroka og Fauskevarden
Frå Fauskevarden gjekk vi ned til Flotevatna, hadde ein liten pause der før vi gjekk på toppen av Halbrendsnipa.

Tidleg morgon på veg opp til Fureviknipa
Dertter vidare ned til Kalsetdalen og gjennom skogen til Prestestølen og over til Bekkjavatnet. 
Der hadde vi dagens første litt lengre stopp. Nokre bada til og med i vatnet.

Så gjekk vi opp til Hafstadfjellet frå vestsida, og ned att bilvegen til Bruland, og vidare til Soleide. Turen ned frå Hafstadfjellet var den kjedelegaste delen av turen, synast eg. 

På Soleide hadde vi ny god pause, før vi tok fatt på stien opp til Viefjellet
I lia oppover var det veldig varmt, og dette var nok den tøffaste delen av turen for dei fleste. 
Frå Viefjellet tok vi stien ned til Flugedalen og til Ryggjabrua. 

Ved Ryggjabrua venta dagens store høgdepunkt: pizza og brus! 
Det ga krefter til å ta fatt på siste del av turen. 
Vi gjekk opp til Hjellestølen der det vart tatt bilete av dei 54 personane som framleis var med 
(av 62 som starta), 
og så var det siste etappe opp til Førdsnipa

Ned att kunne vi velje om vi ville gå via Flatestølen eller Skeistølen
- dei fleste valte ruta via Flatestølen og ned att til Grovene. 
Der var vi ca. 22.45.

Det var med god kjensle eg la meg i senga den kvelden!

Det er ikkje så lett å ta mange og gode bilete på turen når du skal halde deg i rekkja, men her er nokre fleire bileteglimt:

Første topp er nådd - Fureviknipa - berre 6 igjen.....

På veg mellom Fureviknipa og Skinnbroka


Fauskevarden - 3 toppar er ferdige!

Halbrendsnipa i sikte

Klassikarutsiktsbilete frå Hafstadfjellet

Og så var vi plutseleg kome på Viefjellet.... 6 done, 1 to go! 

Sjeldan har vel pizza smaka betre....

Vi nærmar oss siste topp - Hjellestølen er nådd. 

We did it! Ein dag - 7 fjell! Førdsnipa var siste topp ut. 

Og då var det berre å ta fatt på siste delen ned att til Grovene. Klokka har bikka 22, og ein lang dag er snart over. 




mandag 17. juni 2019

Mjølkeflathytta - dagsturhytta i Lærdal



I store norske leksikon står det: 


"Klimaet i Lærdal er svært tørt, med en årsnedbør på 400–500 mm. 

Kunstig vanning har derfor rike tradisjoner. 
27. juli 2018 ble det målt 33,4 grader i Lærdal og dermed satt ny temperaturrekord i Sogn og Fjordane. 
Største mainedbør ble målt på Maristova 2013 med 102,2 mm."

Det var derfor kanskje nokså unikt at vi fekk regn i Lærdal, 
eller var det, det? 
I alle fall så hadde vi ein del regn denne laurdags formiddagen - i Lærdal, 
så det er ikkje alltid slik at det er tørt der i alle fall. 
Men det skulle bli betre utover dagen, 
og med 13 km og 1100 høgdemeter i beina frå dagen før, 
- til vakraste Fagerset og Vatnanosi -, 
så passa det bra å ta det litt roleg på formiddagen.

Her er eit glimt frå turen til Fagerset og Vetanosi - sjekk utsikta! Denne kan verkeleg anbefalast! 
Og det var ein akkurat passe dag til å teste ut lågterskelturen til dagsturhytta i Lærdal: 
Mjølkeflathytta. 

Dette vart vårt dagsturhyttebesøk nr. 10 (av 26).



Slik finn du fram: 
Vi starta turen frå Lærdal ferie- og fritidspark. Derifrå gjekk vi over brua til inngangen av Fodnestunnellen. På venstre sida står det informasjonsskilt om ulike turalternativ. 

Vi valte å gå direkte over tunnellopninga og mot Mjølkeflathytta på godt merka sti, og ein knapp kilometer gange. Lett terreng å gå i med lite stigning (knappe 100 meter). Fine utsiktspunkt over Lærdal sentrum og fjorden også undervegs på turen:



God sti og lett å finne fram. 


Frå Mjølkeflathytta valte vi å gå vidare oppover i skogen og følgje stien tilbake om Jektesanden. På veg ned mot fjorden kan ein gå bort til ein bunker som var bygd av tyskarane under andre verdskrig. Nede ved Jektesanden var det truleg ein båtplass den tid fjorden gjekk lenger inn, og gamle murar vitnar om at området har vore bebudd. 

Samla turlengd: 1,7 km

Som dei fleste av dagsturhyttene, er dette derfor ein lågterskeltur som passar for dei aller fleste som kan gå i litt ulendt terreng. Fin tur for små bein! 


Klar, ferdig - hopp!
Frå hytta er det fin utsikt over Lærdal - så her kan ein lett sitje å planleggje nye fjellturar opp dei bratte fjellsidene som elles omkransar bygda. Det var i alle fall det vi gjorde! 






Frå Mjølkeflathytta kan du også gå vidare til Stødno, og så gjennom Lærdal sentrum tilbake til startpunktet om du ynskjer ein lenger tur.



Her er nokre glimt frå Jektesanden som vi passerte på returen: 


Etter turen fekk ungane boltre seg i Motorikparken - kjekk aktivitetspark for ungane. 

fredag 7. juni 2019

Orrabu - dagsturhytta i Leikanger

Dagsturhytta "Orrabu" på Leikanger
Ved ankomst Leikanger i 18-tida på kvelden, og delvis regn og hagl i lufta, var ein lågterskeltur eit passeleg turmål. Kva passar vel då betre å teste ut turen til dagsturhytta "Orrabu"? 

Som sagt, så gjort! 

Flott utsikt over Sognefjorden på veg opp slalombakken. Parkeringa ligg bak bygningen midt i biletet. Følg stien oppover slalombakken for å kome til dagsturhytta. 


Slik finn du fram: 
Frå houvdvegen tok vi av til Kleppa (6 km) rett ved Statens Hus i Leikanger. På Kleppa er det slalombakke, så sjølv om det var eit stykke å køyre og nokså svingete oppover lia, så gjekk det veldig greit å kome seg fram sjølv for oss med ein litt større bubil. Stor plass til parkering når du kjem fram. 

Hytta er avmerka med blå trekant på kartutsnittet. Du svingar av til Kleppa rett ved Statens Hus på Leikanger. Det står skilt ved hovudvegen. 
På heimesida til dagsturhytta Orrabu står det at du skal følgje vegen til Husabøstølen og så ta av mot Øvstestølen. Det sto mange skilt ved parkeringplassen, men ingen som sa noko om namna Husabøstølen eller Øvstestølen. Sikkert kjende og sjølvsagte namn for dei som bur i området, men for oss ga det ingen peikepinn på kor vi skulle gå! 

Heldigvis hadde vi på førehand fått eit hint om at ein berre kunne følgje stien opp slalombakken. Det gjorde vi til kanten over henget. Der svinga vi til høgre og følgde skitrekket vidare heilt til enden. Der svingar du igjen til høgre, inn på ein god sti som er delvis tilrettelagt med klopper over myrpartia. Etter 200 meter er du framme ved Orrabu. 

Det er litt bratt opp slalombakken, men her er det eit "must" å stoppe opp og snu seg for å nyte utsikta over fjorden. Turen elles er lettgått og eignar seg godt for barnefamiliar med små born. 

Lengd: ca. 1 km ein veg. 
Høgdeskilnad: ca. 100 m
Tidsbruk: Vi gjekk opp på 20 minutt i passe tempo, men her er det avgjerande kor raskt du greier å gå opp slalombakken. For mange vil det nok vere reelt å rekne 30-40 minutt. 

Straks ved toppen av skitrekket. 
Frå dagsturhytta har du utsikt austover til Hermansverk sentrum, sør/aust inn fjorden til Fresvik, sør til Feios og vestover mot Vangsnes i Vik kommune.





Det gjenstår endå litt arbeid før hytta er ferdig, særskilt uteområdet framsto som veldig uferdig. Men det låg materiale klar til bruk, så her bli nok bra til slutt - her også! 

Sidan vi hadde bursdagsbarn (rett nok ein vaksen) i familien den dagen, vart det litt feiring med kake inne i hytta, før vi returnerte. 


På retur tilbake - og vi kan nyte utsikta på veg ned slalombakken.