mandag 19. juni 2017

Midtbøfjellet (245 moh) på Sandøya i Gulen



Når vi er ute og køyrer på ukjende stader (kjende stader for så vidt også), har vi alltid auga med oss med tanke på aktuelle turmål. Vi ser på fjella og eventuelle vardar, vi følgjer med om det er plassert turskilt langs vegen, eller om det er parkeringsplassar med bilar der det er sannsynleg at folk er på tur.
Mange spanande turmål er oppdaga på denne måten, og slik var det vi oppdaga Midtbøfjellet (245 moh) på Sandøya i Gulen:

Vi kom køyrande, på veg til Skjerjehamn, då vi køyrde forbi ein parkeringsplass med 3-4 bilar på. Vi såg folk som kom ned frå ein sti og vi såg eit skilt som viste veg. Eg var raskt inn på ut.no og søkte opp turmål i nærleiken, og der dukka Midtbøfjellet opp. Når ytterlegare søk på Google synte at dette var høgaste toppen på Sandøya, og at det var ein relativt kort tur, så vart det raskt bestemt at den kunne vi ta neste dag før vi skulle køyre vidare.

Skjerjehamn først - slik planen var, så Midtbøfjellet neste dag. 
Turen står skildra på ut.no. Den startar ved Byrknesvegen ovanfor Ånneland. Litt bratt sti i starten, og etterkvart deler den seg i to. Du kan velje begge alternativa, for dei møtast att lenger oppe. Etter ein knapp kilometer står du på toppen, og heile turen er greitt unnagjort på 1 time t/r også for små bein.

Turinformasjon ved startpunktet. 
Det gjekk fleire stiar til og frå toppen, så det er nok ein del andre turalternativ også. Men dei har ikkje vi prøvd.


Toppen har flott utsikt over alle øyane og innover Stølsheimen. For oss sunnfjordingar er det heller ikkje daglegdags å sjå oljeplattformer når vi er på fjelltur - men dei får du sett mange av her!
Toppen er fjelltrimpost for Ytre Sogn Turlag, og er ein ypparleg barnetur. Den inngår også i 3-fjellsturen som vert arrangert av turlaget i samarbeid med Barnas turlag Gulen. Dei 2 andre toppane er Veten på Byrknesøy og Piltevarden på Mjømna.



Oljeplattformer er ikkje noko daglegdags syn for oss i Indre Sunnfjord!

På veg opp passerer du denne flotte rasteplassen - Ånneland terasse. Her må det vere fint å grille og kose seg! 

Kartutsnitt frå ut.no

søndag 18. juni 2017

Veten (194 moh) - rundtur over Byrknesfjellet i Gulen


Ute ved kysten, treng ein ikkje gå høgt og langt for å kome til dei høgaste toppane i området. Veten (194 moh) - som for øvrig er eit kjært namn på mange kystfjell/åsar - er det høgaste punktet  på Byrknesøya i Gulen.

Ved Siletjønna, ca. 2 km før Byrknesøy, står det skilt og turinfo til Veten - eller Byrknesfjellet som rundturen vert kalla. Det er laga til ein stor parkeringsplass ved vegen, og vi parkerte bubilen der for natta. Eg fekk gleda av å leggje ut på ein fin kveldstur i solnedgangen over Byrknesfjellet.

Grei og enkel turinfo ved startpunktet ved Siletjønna. God merking!

Turen er godt merka, og det er lett å finne fram. Litt bratt i starten, elles fin, men litt våt sti. Først kjem du til Varden. Der er det bok å signere i for dei som ynskjer det. Vidare fin (men framleis våt) sti til Nyksvatnet. Der kan du signere i eindå ei turbok! Nyksvatnet er drikkevasskjelde, så her bør du ikkje ta eit bade sjølv om det kan vere freistande på fine dagar. Stigninga vidare opp til Veten (194 moh) er jamt bratt.

På toppen får du flott utsikt over Ytre Gulen, til Solund, Øygarden, Fedje og ut i havet mot vest!

Turinfoen ved startpunktet skildrar ein rundttur med bratt nedstigning mot Nyksvatnet, og som endar på Gråvikvegen. Eg gjekk i staden vidare på ein godt merka rute sørover som runda mot Snaufjellet ,og vidare ned mot Gråvikvegen. Heile vegen gjekk eg på flotte berg, og det var om lag 1,5 km frå toppen av Veten og ned på Gråvikvegen via Snaufjellet. Å gå denne turen opp og ned same veg, er ein fin korttur for småborn. Her kan ein også gå relativt tørrskodd då heile stien går på berg, i motsetning til turen opp frå Siletjønna som var relativt våt einskilde stader. Deretter var det bilvegen attende til Siletjønna ca. 2,5 km.

Samla distanse 7 km.
Du bør  berekne 2-3 timar samla turtid alt etter form. 

Turen frå Gråvikvegen, via Snaufjellet og opp på Veten er også omtala i Opptur Sogn og Fjordane.

Første "høgdepunkt" på turen - Varden - med utsikt mot Mjømna


Det var mange turpostkasser og bøker å signere seg i på ein relativt kort tur :) Her ved Nyksvatnet. 

Det er viktig å hugse på å snu seg tilbake og nyte utsikta undervegs. Ein vakker junikveld i Gulen!

Flagget var heisa til topps på toppunktet Veten (194 moh). 

Utsikt sørover frå Veten

Vel attende til bubilen i 21.30-tida, vart det eit forfriskande bad i Siletjønna. Ikkje den varmaste temperaturen tidleg i juni, men det gjorde godt. Det er laga til stupebrett ved tjønna, så det er nok ein populær badeplass om sommaren om ein ynskjer noko anna ein sjøbad.

Veten (194 moh) er ein av tre toppar i ein 3-fjellstur som blir arrangert av Ytre Sogn turlag og Barnas turlag Gulen. Dei andre to toppane er Piltevarden på Mjømna og Midtbøfjellet på Sandøyna.

Turen er også skildra på ut.no sine sider 


lørdag 17. juni 2017

Veten (486 moh) - høgaste fjellet i bydelen Åsane i Bergen

Den Trondshjemske Postveg og mange flotte steinhus langs vegen i Åsane

Kvifor ikkje avslutte IKEA-turen med ein fjelltur? 
Einskilde vil vel hevde at ein IKEA-tur i seg sjølv er ein bra trimtur 
- ikkje berre for lommeboka, men også for føtene som skal traske metervis gjennom sofa, stolar, garderobeskap, kjøkkeninnreiing, plantar, pynt og dekorasjonar m.v. 
Handleturen liknar dessutan på eit orienteringsløp der ein skal finne rette vegen til neste etasje, eller ut av butikken. 
Er ein så skammeleg at ein har prøvd seg på nokre snarvegar, så risikerar ein fort nokre ekstrarundar i staden!

Så det er vel kanskje sofaen ein drøymer mest om etter IKEA-turen heller enn ein fjelltur......
Og er du som oss - som kan prestere å bruke 10 timar på IKEA, 
så er i alle fall sofaen/senga neste steg 
(når ein endeleg har fått pakka ut av bilen...)!!!!

Vi som berre skulle ha noko småttteri...
og endå var vi ikkje ferdige!

Men gjer du unna IKEA-turane litt kjappare enn oss, 
så tenkjer eg du har overskot til ein liten fjelltur også.... 

eller så kan du sende ektefellen på fjelltur medan du er på IKEA... :) 
(eg er derimot så heldig å ha ein mann som er minst like ivrig på IKEA-shopping som meg...)

Uansett - om du er i nærleiken av IKEA i Åsane, så har eg eit godt fjelltips til deg. 
Veten (486 moh) er det høgaste fjellet i bydelen Åsane. 

Rett nok kan fjellet kanskje meir rett definerast som ein ås, men utsagnet: 
"Mannen som gjekk opp på ein ås, men kom ned frå eit fjell", 
passar godt her. For med utsikta på toppen, så føler du at du er på topptur!

Turskildring: 
Turen er omtala på ut.no som Veten via Trondhjemske Postveg. Der finn du også god skildring av startpunktet og turen. 
Ved rundkøyringa ved IKEA, tar du av til Dalevegen - forbi IKEA og 1,5 km innover til du finn ein godt tilrettelagt parkering ved Melingen. 

Kartutsnitt med turen innteikna  - henta frå ut.no

Frå parkeringa må du gå nokre hundremeter tilbake for å starte på Den Trondhjemske Postveg. På ut.no er turen foreslått om ein rundtur. Vi gjekk tur/retur. Du følgjer den Trondhjemske Postveg ca. 1,3 km. Då kjem du til Rimmaskaret der det ligg eit flott steinhus (som du for øvrig passerer mange av på vegen). Der er det skilta mot Veten. Så er det ca. 1 km med stigning på 200 meter før du står på toppen. Med ca. 380 meters stigning samla sett, og total distanse på 2,5 km er dette til ein fin tur for born. 
Stien er mykje brukt, og derfor delvis blaut. Sko som toler vatn er derfor å tilrå!

Frå toppen er det flott utsikt mot Nordhordalansdbrua - mellom anna!
Forutan panoramautsikta på toppen der vi kunne sjå heilt ut til plattformene i Nordsjøen, vart vi fascinert av dei flotte steinhusa langs Den Trondhjemske Postveg. Vi passerte fleire av desse, og mange kunne du gå inn i. Dersom du har interesse for geocaching, er det fleire å plukke med seg på vegen også, inkludert ein på toppen. 

Berre ein god kilometer frå kjøpesentera i Åsane, så kjem ein til landlege idyllar. Vakkert!


#dabbing på fjelltur #fjelldabbing

I full fart mot varden - med utsikt mot Bergen sentrum


Fleire geocacher å finne på turen.
Dette var ein av dei!









mandag 12. juni 2017

Sjekk inn, sjekk ut, pling her, registrer der.....

Pust inn, pust ut..... mellom alle innsjekkingane på Førdsnipa (863 moh)

Å gå på fjelltur er ikkje lenger å snøre på seg fjellskoa, hive sekken på ryggen, ta turen til fjells og signere i boka på toppen........!

Er du ein av dei som opplever at fjellturen er blitt litt sånn:

sjekk inn, sjekk ut, pling her, registrer der? 

Eg skal no skildre ein fjelltur eg og min kjære hadde ein ettermiddag i forrige veke for å vise kva eg meinar:

Vi parkerte ved Hjelle i Angedalen i Førde, og planla å gå Hjelle - Hjellestølen - Førdsnipa - Hornnesstølen - Bergum.

Som sagt så gjort: Det var ikkje sol frå skyfri himmel, tvert om var det overskya og vi følte nesten at det vart regn. Heldigvis heldt det seg opplett og temperaturen heldt seg varm og fin, så det var flotte forhold for fjelltur!

Det første som skjedde var at eg sette i gong pulsklokka mi. Ikkje for å måle pulsen, for pulsbeltet mitt gløymer eg nesten alltid. Tidsbruken er litt viktig, men ikkje det vesentlege det heller. Det aller viktigaste er nemleg å måle lengda - eg har nemleg som mål å bevege meg minst 2017 km i 2017. Derfor må eg vite kor langt eg går, og klokka vart dermed sett i gong!

Turen gjekk vidare raskt og greitt opp til Hjellestølen etter ca. 2 km. Og då starta moroa for alvor. Først måtte eg sjekke inn Trimpoeng - som deltakar i Sprek i Førde kommune får eg 2 poeng for å gå på Hjellestølen. Når eg registrerer meg på den aktuelle posten, skal eg Sjekke inn.



Så har eg lasta inn ein app som heiter ToppsTur. Det er ei digital turbok der du kan sjekke inn små og store turar. Der ligg ein del forhåndsdefinerte turmål, men Hjellestølen var ikkje ein av desse. Derfor måtte eg først registrere forslag om turmålet, før eg kunne registrere turmålet.

Ein kollega av meg kommenterte nokre dagar tidlegare at eg var registrert på Peakbook, men ikkje hadde så mange turar.....
Den store planen var å få lagt inn alle fjellturane mine som det etterkvart har blitt nokre hundre, truleg tusen av - men så langt kjem eg jo aldri.....


"Men no er det jo så enkelt å sjekke inn med appen", seier han då. 

"Javel," tenkjer eg, "då kan eg kanskje registrere dei turane eg tar framover, så kan eg heller leggje inn dei gamle litt etter litt". 

Det var nok til å få meg på Peakbook-kjøret også, så då var det inn i appen og registrere tur på Hjellestølen......

Ankomst Førdsnipa og eg er klar til registrering.....

Så gjekk turen vidare til Førdsnipa på (863 moh), og der starta moroa for fullt - berre høyr:

  1. Skrive meg inn i turboka i postkassen
  2. Registrere meg på DNT sin nye Sjekk Ut app. Førdsnipa er ein av titurane til Indre Sunnfjord Turlag i år. 
  3. Registrere meg på Toppstur (her var heller ikkje Førdsnipa forhåndsdefinert, så eg måtte leggje inn forslag om turmål)
  4. Registrere meg på Peakbook

Etter litt sjokolade og drikke, la vi kursen mot Klumpen og Hornnesstølen. Etter eit par minutt, ropte eg til min kjære: 
"Søren, eg gløymde å sjekke inn trimpoenga!" 

"No er det for seint", svarte han med litt skadefryd. "Å neida," svarte eg og tok opp appen for å sjekke kor langt eg måtte tilbake for å vere innanfor rekkevidde til at den grøne Sjekk inn-knappen skulle lyse. Heldigvis var eg berre ca. 20 meter i frå, og skunda meg sjølvsagt attende for å gjere unna innsjekkinga. 


Så vart det ei fin vandring ca. 3 km frå Førdsnipa til Klumpen med utsikt over Førdefjorden - og utan innsjekkingar: 

På Klumpen (585 moh) var det "berre" tre ting som skulle gjerast: 
  1. Skrive seg inn i turboka i varden
  2. Sjekk UT
  3. Registrere Peakbook
Eg gadd ikkje leggje inn forslag om nytt turmål i Toppstur, og ikkje var det noko trimpoeng å få. 

Siste "høgdepunkt" på turen var Hornnesstølen, men no var det igjen 4 ting som skulle ordnast: 
  1. Skrive seg inn i turboka i "varden"
  2. Sjekk UT
  3. Registrere Peakbook
  4. Registrere Trimpoeng
Då skulle ein tru det var strake vegen ned att Eventyrstien til Bergum, men den gong ei...... ved gapahuken om lag halvvegs mellom stølen og Bergum, er det tid for nye registreringar. Vi skreiv oss inn i turboka, og då eg tok fram mobilen kom det tørt frå min kjære: 

"Sjekkar du inn meir no, så vil eg ikkje gå på tur med deg meir!" 

Men vi lar oss ikkje true, og 2 nye trimpoeng vart sjekka inn! Eg kunne endeleg feire at eg hadde bikka 100 poeng: 


Så kva vart resultatet av denne turen - bortsett frå at det var ein fin fjelltur? 

Jo, det skal eg seie deg: 
  1. 4 innskrivingar i turbøker
  2. 9 trimpoeng på Sprek i Førde kommune
  3. 3 Sjekk Ut - innsjekkingar
  4. 4 Peakbookregistreringar
  5. 2 ToppsTur
  6. Ca. 10 km gange
  7. Tidsbruk: akkurat passe ;) 
- og då har eg ikkje tatt med bileta som vart publisert på Instagram, videoen på Snapchat, og dette blogginnlegget.....


Jammen er det travelt å gå på fjelltur!
(men for all del - eg gjer det jo friviljug!)

fredag 12. mai 2017

Esefjorden Rundt - Norges lengste 1. mai tog?

Esefjorden Rundt er vårens vakraste eventyr i Balestrand! 

Rundt denne fjordarmen går løpet Esefjorden Rundt.
Det majestetiske fjellet midt i biletet er Vindreken. Til høgre for dette ligg Keipen. 

Kvar 1. mai vert dette landevegsløpet arrangert, 
og kanskje kan dei skilte meg Norges lengste 1. mai tog?
Over 900 deltakarar har det vore på det meste. 

Vi var med på årets løp for første gong
- ikkje som aktive løparar, men som familietur i trimklassa! 

Løypa er 8,5 km og går langs bilvegen frå Tjugum Kyrkje nær Dragsvik og rundt heile Esefjorden til Balestrand sentrum. 
Det er liten høgdeskilnad, så det er lett å gå - også for små bein. 
Løpet startar ved Tjugum kyrkje og går rundt heile Esefjorden til sentrum av Balestrand. 

Den majestetiske naturen rundt Esefjorden, gjer at ramma rundt løpet er unikt. 
Utsikta til dei flotte fjella Vindreken og Keipen kan nesten ta pusten frå deg!
Dit får du garantert lyst opp - om ikkje høgdeskrekken tar deg! 
Vegen er også en del av Nasjonal Turistveg Gaularfjellet. 

I 2017 vart løpet arrangert for 38. gong som landevegs- og mosjonsløp. 
Men det er 86 år sidan fyrste "Esefjorden Rundt" - den gong som eit skirenn. 
Sidan vegen vart brøyta, vart det etterkvart vanskeleg å arrangere skirennet. 
Siste året vi finn noko om skirennet er i 1956, 
og etter dette gjekk det ytterlegare 20 år før "Esefjorden Rundt" vart sett på plakaten att. 

Løpet er ein stor folkefest, og over halvparten av deltakarane er under 16 år. 
Undervegs i løpet vert det også arrangert ein spørjekonkurranse for trimmarane. 
Her fekk vi testa våre lokalkunnskapar!

Det vert organsiert båtskyss over fjorden frå Holmen i Balestrand og til startpunktet ved Tjugum kyrkje. 
På veg ut av båten - klar for tur!

Vi tok oss god tid på turen og hadde ein matpause i botnen av fjorden. 
Der rakk vi også å leite etter ein geocache. 

Men dei som deltek i løpsklassen, gjer runda unna ganske raskt. 
Her er løyperekordane: 
Kvinner: Annie Bergsagel, Tjalve: 29.08 (2008)
Menn: Marius Vedvik, Gaular IL 24.29 (2015)

Nokre glimt frå turen vår: 
Utsikt mot Balestrand sentrum






Alle som fullfører løpet for 1. gong får medalje.
Fin belønning for dei minste i alle fall!
Om du har lyst til å delta på løpet neste år - eller eit anna år - så finn du meir informasjon på Esefjorden Rundt sine heimesider. 

tirsdag 9. mai 2017

Fjordalangs frå Solvorn til Nyre

Vakre Lustrafjorden: Å vandre fjordalangs kan vere like fint som å gå på topptur!

Mai er tida for dei flottaste toppturane på ski. 
Instagram er fylt opp av bilete av glade skifolk.
Og vi kan bli litt misunnelege.... 

Men ikkje alle kan gå på ski av ulike grunnar, 
og slett ikkje alle likar å gå på ski! 
Nokre er kanskje også lei av skisesongen, 
og ynskjer å ta beina fatt. 

Sidan snøen framleis ligg på fjelltoppane, 
er det avgrensa kor høgt det er kjekt å gå til fots. 
Så kvifor ikkje nytte høve til å ta nokre vandringar fjordalangs i staden?

Langs veglause strender ved Sognefjorden er det mest populære innlegget på bloggen. Men det finnast også mange andre fine vandringar fjordalangs ved Sognefjorden. 

Berre èin liten bakke!
I helga testa vi ut stien langs Lustrafjorden frå Solvorn til Nyre
Turen er knappe 3 km ein veg med start frå kaia på Solvorn. 
Med unntak av ein bratt bakke i starten (Kleivabakken), går turen i lett terreng med ein høgdeskilnad på 20 meter. 

Stien er ein gamal buførings- og slåtteveg, og har mange flotte viker og svaberg. Det er tørt og fint å gå, og er godt eigna for små born. Turen gjev flott utsyn mot Molden (1118 moh), Ornes og Feigumfossen, og innover heile fjorden til Skjolden. 

Om lag halvvegs, etter ca. 1,5 km kjem du til ein fin badeplass som heiter Mosaviki. Tidlegare var det to husmannsplassar og frukthage i Mosaviki. Fram til 1970-talet sto det også eit lite vassdrive sagbruk her. 
Her er det fint å grille, og det er laga disse til ungane, og mange fine berg å klatre i.

Det var mykje barnefamiliar ved Mosaviki denne flotte maidagen. 
Vidare utover passerer du Artnes der du finn restar etter utgraven gravrøys. Mellom Artnes og Djupviki finn ein restar etter Solvorn skyttarlag si eldste skytebane. 

Benken ved Nyre

På Nyre er det slåtteteigar som var i bruk fram til 1960-talet.
Det er også mogeleg å gå vidare utover langs fjorden, og du vil finne ei rekkje gamle slåtteteigar. Desse var svært viktige for småbruka i Solvorn. Det var også fleire små frukthagar langs fjorden.

Ved Nyre er det ein sitjebenk der du kan nyte utsikta innover mot Skjolden, opp på Molden og over til Ornes og Urnes stavkyrkje

Vel attende frå turen er det absolutt å verdt å ta seg ein runde i Solvorn sentrum, kjøpe ein is på Solvornbui, ta ein kaffe i Rosehagen til Walaker hotell og ta ein kikk innom Galleri Walaker 300







Kartutsnitt over turen - registrert med Suunto Ambit 3 Sport

Fleire bilete frå turen: 


Bygda Ornes ligg på andre sida av fjorden - kjent for Urnes stavkyrkje
og Feigumfossen. Det går ferje mellom Solvorn og Ornes. 
Små og store kosa seg på dissa :)





Walaker hotell