torsdag 10. mai 2012

1. mai på Holmesetstølen (450 moh)


Stølsfolket var på plass for å gjere selet klart til sesongen!

Det er allereie byrja å bli nokre dagar sidan 1. mai, men det er aldri for seint å skrive om ei flott turoppleving. Og det fine er jo at turen "aldri" forsvinn: den ligg der og tar i mot nye sjeler som vil ha seg ei god friluftsoppleving!

Sidan vi har hatt både vinter og regn i løpet av mai månad, så er det i alle fall kjekt å minnast at den første maidagen var ein strålande vårdag! Vi hadde farta bra på i dagane i forkant av 1. mai, så vi fann ut at vi ville nøye oss med ein tur i nærområdet, og denne gongen vart det Holmesetstølen i Førdefjorden.

Dette er eigentleg ein av våre småturfavorittar: ein tur som er tung nok til at du føler du får brukt kroppen din, samtidig som du har god utsikt både undervegs og vel framme på stølen. Stølen ligg høgt og fritt, og du ser innover Førdefjorden til Erdalen, og har Heilevangsstaurane rett i mot på andre sida av fjorden. Som Jorunn Kleiven skildrar det i boka "Gå sjøl":
Mot nordaust ser vi byggjefelta i Naustdal som kry opp mot Kletten. Innover langs Førdefjorden glir bilane som små, raske insekt på vegen mellom Naustdal og Førde. Kråkenes stikk ut i fjorden på ein odde med frodige åkrar, medan Lisjehesten, Storehesten og Heilefjellet reiser seg mot himmelen i sør. Mellom fjell og bygder ligg fjorden som eit blått, duvande teppe."

Tidlegare har vi brukt å gå denne turen 1-2 gonger om året, gjerne tidleg på våren når snøen nett har reist eller på vinteren på skaren. Noko overraska vart eg derfor då eg kikka tilbake i fjell-loggen og fann ut at vi ikkje har vore der sidan 2008 - og faktisk også den gongen på sjølvaste 1. mai. Heile 5 år sidan sist!

For trimmen sin del, valte vi å gå den tyngste vegen opp - nemleg skogsvegen frå Holmeset. Denne er ganske lang og bratt, og tung nok når ein berre skal bere si eiga vekt. Med barn i bæremeis på ryggen, kan eg love deg at det var enda tyngre! Så vi angra litt på valet vårt undervegs....

Skogsvegen har blitt graskledd sidan sist vi gjekk der, og den fører oss nesten heilt fram til stølen. Dei siste hundre meterane må du gå over myrete terreng før du er framme ved stølshusa.
Vi startar friskt med å gå på eigne bein...
På stølen var stølsfolket på plass for å gjere sela klar til sesongen. Det er (sjølvsagt) gardane på Holmeset som har støl her oppe. Vi blei tatt veldig hyggjeleg i mot, og fekk flott omvisning! Utanfor sela er det sett opp ein stor benk der du kan sitje å ete nista di medan du nyt utsikta. Ungane kosa seg, sola skinte og brått hadde vi vore der i nesten 2 timar. Minstemann sutra som følgje av manglande formiddagslur, så då var det berre å ta fatt på heimvegen. For å få ein rundttur, gjekk vi stien ned til Øvrebø attende - det er ein atskilleg lettare tur, og veldig fint eigna for små born. Det er ganske vått i stien, så støvlar eller fjellsko anbefalast!

Postkasse fann vi også på stølen - den står på hjørnet av ei utebod. Det var nett lagt ut ny bok av Frammarsvik helselag, gjeldande frå 01.05.12. Utanpå boka sto det informasjon om andre turar og poenggjeving, og det låg også kart i boksen som viste kor dei ulike turmåla går:
Vi var så ivrig i praten, at vi gløymde å ta noko særleg bilete av utsikta og området. Eg trudde kanske vi hadde nokre bilete liggjande frå tidlegare, men det var heller ikkje så mykje av. Men her er i alle fall eit bilete som gjev eit lite inntrykk av kva du ser frå stølen:
Utsikt frå Holmesetstølen


Turfakta:
Du kan velje mellom to startpunkt; den eine er "lang og bratt", medan den andre er "kort og lett".
Frå Naustdal sentrum køyrer du vestover langs Førdefjorden på rv. 611. Rett etter byggjefeltet på Liabø, går det ein skogsveg oppover til høgre. Her startar du om du skal gå den brattaste turen. Turen opp tar 45 min - 1 time.

Køyrer du litt lenger, står det eit skilt til Øvrebø. Her tar du av, og køyrer til den øvste garden, Bunnestølen. Vegen stoppar ved eit kraftanlegg der du kan parkere. Derifrå går du over ei lita bru, ta opp mot venstre og vidare beint fram gjennom eit myrlendt parti. Stien er merka med gule og kvite band. Herifrå tar turen til stølen om lag 20 min med ein høgdestigning på 130 m. Denne eignar seg derfor godt for små barn.

Ynskjer du ein rundtur, kan du gjere slik som oss: Gå den eine vegen opp og den andre attende. Det er eit stykke å gå på veg frå kraftstasjonen på Bunnestølen og ned til rv 611, og tilbake til bilen, men i samla tid brukar du om lag det same som når du går opp skogsvegen. Samla tid på rundtturen: ca. 2 timar.



Kartutsnitt som viser rundturen - dei to startpunkta er merka med blått (http://www.ut.no/)

Vegen frå Naustdal og ut til Holmeset der du startar (www. ut.no)


Vi kosar oss med nista vår :)
 
1. mai var som sagt ein nydeleg dag, og det var mange som var på tur denne dagen:
Indre Sunnfjord Turlag var på skitur til Blegja, Eli Kristin i Skorpionens hjørne var på Hatlesetnipa og tok mange flotte bilete derifrå, og Inger Elin i tingeling på opptur var på skitur på Gjegnen. Gjegnen er eit av dei turmåla som står høgt på ynskjelista mi (rett nok til fots), og håpar det kanskje byr seg ein sjanse i år???? Uansett, ta ein tur inn på sidene over og sjå på dei flotte turane!



2 kommentarer:

  1. Fint og variert terreng å gå der. Jeg liker stølsturer, så jeg håper det blir en del slike i selskap med mine småtroll også :)

    Flotte turbilder, sprekfolk!! :) Rart med det når man er i godt selskap og mye å snakke om, da glemmer man av og til å forevige det flotte man nyter og tar inn underveis. Godt vi kan samle gode inntrykk i topplokket og ta vare på minnene på den måten :)

    Ser frem til flere slike 1. mai-dager både værmessig og med fri, he-he. Har ikke hatt samme go'vær siden den dagen, men tror vi har vært innom de fleste årstider - og det gjerne i løpet av et døgn også. Rare greier!

    I dag blir det ingen tur, men storoppgjøret mellom Florø SK og Førde. Det er fotball som gjelder ;) Har dere planer om Øyane Over på søndag?

    Ønsker dere en flott 17. mai! :D

    SvarSlett
  2. Alltid like kjekt å klikke seg inn på denne bloggen, for da ligger det flotte turbeskrivelser og bilder å venter.
    Litt av en utsikt for en så kort tur. Nydelig.
    I dag skal jeg ta med jentene og hver deres venninne ut på tur i ruskeværet. Det finnes ikke dårlig vær så lenge man har fri, da MÅ vi ut på tur. Regndressene henger klar :-)
    God helg!

    SvarSlett

Eg vert veldig glad om du har lyst til å leggje igjen ein kommentar når du har vore innom bloggen min! Og kom gjerne med spørsmål om turar og turmål :)!